RADIOTHERAPY (Mizo)

Mipui nawlpui chuan Cancer natna hi kan hre fur in a rinawm, chutih laiin a enkawl dan hi kan hriat tel a pawimawh ang. Cancer hi natna chikhat, hmuhchhuah hma a; enkawlna dik pek chuan dam thei a ni. Cancer enkawlna hi hlawm lian pui pui pathumah a then theih ang, chung te chu: Surgery (Zai), Chemotherapy (Damdawia enkawlna) leh Radiotherapy (Hem) te an ni.

Radiotherapy chu zungzam chak tak (ionizing radiation) hmanga cancer timur te that/tihlum tura enkawlna a ni. Radiotherapy hi kawng hnih – Tihdam tuma enkawlna leh Nunna pawh sei/ na chhawkna tura enkawlna atan hman thin a ni. Dan naran in Cancer la nasa lo leh la taidarh lo ah chuan tihdam tuma hman thin a ni a, chuvang chuan a enkawlna pawh a hautakin hun a duh rei a, damlo pawn an tuar deuh thin.

Radiotherapy hi chi hnih a awm a, Teletherapy leh Brachytherapy.

Teletherapy ah chuan damlo kha a mutna tur bika duanah mu in, Damlo taksa atanga 80-100 cm vela hla atanga hem thin a ni a, Kartin ni 5 atanga kar 7 chhung enkawlna hian a duh thin a ni. X-ray kan laka kan awm dan ang hi a ni mai a, thil danglam; han lum emaw sa deuh vur ang chi hi a awm lo.

Brachytherapy-ah chuan, Cancer timur thattu tur zungzam pechhuaktu (Radioactive source) chu a natna hnaih thei ang berah dah thin a ni a, hmanraw chi hrang hrang hmanga operation theatre a buaipui a tul chang a awm thin. Enkawl dan chi hrang hrang a awm a, kartin vawi khat, nikhatah vawi hnih emaw a natna a zirin a hem dan hi a in ang lo nual thin. Brachytherapy hi chi hrang pali ah a then theih a, chungte chu: Intracavitary- Chhul (Uterus), chhulhmawr (Cervix) cancer etc atan, interstitial- Tihrawl, Hnute cancer etc atan, Surface mould-chhul hmawr cancer zai tawh, vun cancer etc. atan.

Radiation treatment lak laia hriattur pawimawhte:

  • Radiation treatment lak laiin kartin vawi khat tal mahni Doctor hmuh ziah tur.
  • Hemna lai tih huh loh hram tur.
  • Hrawk leh chawkawng hem te tan thil a daiin ei thin tur.
  • Tuisik in tam tur.

Radiotherapy Pawimawhna:

Cancer enkawlna hrang hrang te hi an pawimawh vek a, chutih lai chuan Radiotherapy pawimawh leh zualna chu cancer damlo zawng zawng deuh thaw hian an natna enkawl nan eng hunah emaw chuan Radiation treatment (Hem) hi an mamawh thin a ni. Radiation treatment hmun (centre) din hi a hautak em em a, damdawiin zawng zawngin neih theih a ni lo. A khawl man leh enkawlna a hautak piahlamah a bika thiamna nei chi hrang hrang mamawh a ni bawk. MSCI in Radiation treatment centre kan nei hi  kan vannei em em a ni.